Spritzer 2016

Müeh mit de Chüeh

D Willadinger Bure si närvös
D Choppiger die hei ou cheibe bös
Si fahre mit Traktore hin und här
u springe umenang und chrütz und quer

 

Si hocke nid ir Beiz u nid im Stau
nid ufem Ofebänkli und sueche ou ke Frou
Was isch ou los was tuet se so verstöre
Dir wärdet das vo üs grad jetze ghöre

 

Wüu si hei Müeh mit de Chüe Müeh mit de Chüe Müeh mit de Chüe Müeh mit de Chüe
Müeh mit de Chüe Müeh mit de Chüe
Chüeh gä so viu z tüe

 

Am Stäffe Pek si d Guschti abghoue
D Polizei die muess de ou no grad cho gschoue
Mit Schinwärfer und Wärmebildkamera
doch si hei ke Glück und chöi se ou nid fah

 

Dr Michu tuet mit em Quad dr Waud dürquere
Mit em Frontlader tuet d Eva d Stross versperre
Itz chöme d Jäger u schliche die Herde aa
Doch s klappet nid si müesse se la ga

 

Wi im Wiude Weschte chunnt dr Simu mit em Ross
springt ufnes Guschti fesslets dasch famos
Itz müesse d Förschter cho und Böim umloh
für Frontlader und Vehbänne dürezloh

 

Zwe Täg lang isch die Jagd de schliesslech gange
nächär si die Viecher ändlech gfange
Wäg 4 Guschti sone Sach go mache
Pek tue se s nächscht Mou besser überwache

 

Wüu süsch gits
Müeh mit de Chüe Müeh mit de Chüe Müeh mit de Chüe Müeh mit de Chüe
Müeh mit de Chüe
Chüeh gä so viu z tüe

 

Dr Stäffe Peter het no es Häuferässe organisiert
für die 30 Lüt wo siner Chüeh wieder hei zämeramisiert

 

 

Diri’s Sport

Fassdauelirenne und Segway fahre
beides birgt grossi Gfahre
dr Diri cha es Gschichtli dervo schribe
schliesslich het är längeri Zyt müsse
deheim blibe
Schultere verletzt und Finger broche
und weh düe nem ou aui angeri Chnoche
Diriwächter Männerweekend losch i
Zuekunft gschieder lasi
und unger Alkohol Sport tribe isch ou nüt
für di

 

 

Schwitzverbot

Fitness isch des Beats Luscht
Ja Fitness macht är ohni Fruscht

 

Zu Stäffes geit är Jahr für Jahr
Träniert si Körper wunderbar
Doch jetze darf är nümme go
Wieso

 

Är heig z fescht g’schwitzt das geit doch nid
ime Fitnessrum darf das nid si
drum wott ne dr Bsitzer jetz nümme gseh
Ojemine

 

 

Lüthis Städtereis

E Städtereis uf Münche d Familie chunnt mit
E Fuessball-Match go luege, das wär itz no dr Hit
FC Bayern-Inter Mailand dr Shaqiri isch drbi
für d Lüthi Christine isch es klar do müesse si ou hi

 

Si chönnt 4 Charte ergattere cha ihres Glück chum fasse
doch het si leider im Yfer e Chlinigkeit vergässe
Das Spiu fingt nid in Münche statt und wenn si das wei luege
de müesse Lüthis itze grad sofort uf China flüge

 

 

René’s Vollservice

Wosch du es neus Hüsli ha
de muesch zum Baumberger René ga
Dr René dä chunnt nämlich druus
das hört nid bim Chouf vom Hus
I sim Schaufänschter isch nämlich gschriebe
dass es nid bi däm Service muess blibe
Er betreut nämlich “Liebenschaften aller Art“
de hesch der no grad der Paartherapeut gspart

 

 

Oekotrend ir Regiofüürwehr

Mir si vo dr Füürwehr loufe grad sofort
A dr Houptüebig a dä Isatzort
S Atemschutzfahrzüg isch leider nid im Schuss
Drum stige aui Manne jetz grad wieder us
Mit Verspätig hett de d Uebig doch no gstartet
Zum Glück hett das Uebigsfüür uf di Manne gwartet
D Füürwehr Choppige isch itz völlig in wenns brönnt
tüe jetz immer loufe dasch e Oekotrend

 

 

Am Res si Käsiliferig

Dr Res dä sött ga Joghurt bringe
Si wei amne Ort gar grüseli viu
Schwarzi roti gibeli gäubi
Miuch u Chäs, das isch sis Ziu

 

Dr Ruch Res muess die Delikatesse
i Bütlers Liferwage tue
Doch het är leider im Schuss vergässe
die cheibe Schiebetür zueztue

 

Aer fahrt de los um d Kurve im Egge
das het die Waar gar nid vertreit
U wonär das de ändlech duet tschegge
isch die ganz Stross scho mit Joghurt beleit

 

Dr Wägmeischter hets zwar chönne abesprütze
aber liebi Chäsi, wenn dir die zvile Miuchprodukt weit los ha
de würds doch sicher besser nütze
dir lütet s nächschte Mou diräkt ar Kebag aa

 

 

Töfflimech-Talänt

Dert äne am Wäudli dert steit grad d‘Polizei
I fa hüt mi Lehr a u chume vo dohei
Mis Töffli isch gleitig und schampar mondän
i has drum frisiert das isch hüt modärn
De Bulle gfaut das Töffli und si weis grad ha
jetz muesi haut leider z Fuess i d Lehr ga

 

Eis het dr Herrmann Lars mit dere Gschicht aber zeigt
das är zume grosses Talänt i sire Töfflimech-Kariere neigt

 

 

S Stärnedach

Es Ziegelet, es Ziegelet
es wäiht e chüele Wind
ume Stärne ume
und d Gescht die fliehe gschwind

 

Was macht me da, was macht me da
Ja nid blibe stah
Und hoffe druf dass saniert wird
u Schönis z Gäud düeh ha

 

 

Wägis Schwarzwald-Trip

Dr Wägi und sini Fründin Corinne hei e Schwarzwald-Reis gmacht
D Rueh go gniesse mit em Hung – das isch doch e Pracht
Es churzes Spaziergängli chönnt nid schade, u stattumezhocke
läse si churz dr Wägwiiser und mache sech uf d Socke
Si loufe und loufe und müesse schliesslech gseh
Si finge dr Wäg usem Waud niemals meh
Drü Stung si vergange dr Mage knurret scho
zum Glück isch ir Jagge no auts Brot fürecho
Si marschiere witer mit müede Scheiche
U chöi schliesslech mit letschter Chraft e Bushautsteu erreiche
Dr Bus isch leider gfahre, dr nöchscht chunnt ire Stung
drum müesse si jetz warte ganz elei und mit em Hung
U wo dä Bus isch cho
do si si schampar froh
Und hei bim Usstige no grad die fautschi Hautsteu gno
D Corinne und dr Wägi Highlander mache keni haube Sache
Si tüe usemne chline Spaziergang grad e Survival-Trip mache
Doch eis wei mir öich beidne rate:
Göht nümm usem Hus ohni Kompass, Proviant, Schlafsäck und Wandercharte

 

 

Wägwieser

Weni nume wüsst wo Choppige wär
d Rita u Bedu chöme vo dert här
Z Willadinge luege si aber doof
Wäg däm Wägwieser z mitts im Dorf

 

Choppige, ja Choppige das muesch zersch no finge
Choppige, ja Choppige isch doch näbe Willadinge

 

Weni nume wüsst wo Choppige wär
zum Glück isch das nid so schwär
Dank em Google-Map isch ihne glunge
Affouter‘s hei doch no hei gfunge

 

 

Istellhalle-Crash

Guten Morgen liebe Sorgen seid ihr auch schon alle da
habt ihr auch so gut geschlafen na dann ist ja alles klar

 

Dr Mario und dr Beat die wei jetz grad ga schaffe
si göh i d Istellhalle dört hei si sich de troffe
Si stige beid ganz motiviert i ihri Chäre i
fahre de zum Parkplatz us und luege bedi nid
So bruchts nid viel und scho hets klepft dr Mario isch erstunt
was steit mir jetze do im Wäg – wohär dr Beat chunnt
D Moral vo dere Gschicht – me muess nid geng uf d Stross
dr Verchehr ir Istellhalle isch mängisch ou scho z gross

 

 

Nöi Schi

Aues fahrt Schi, aues fahrt Schi
Joggis wei ou derbi si
Choufe de Schi, choufe de Schi
S wäre die Schönschte gsi

 

Sie chöme vom ichoufe hei vors Huus
und lade die Schi grad us
Dr Stefan parkiert no schnäu der Wage
fahrt über d‘Schi……. Totalschade

 

Der Joggi hätt sich siner Schi gschieder mit em neue Heimlieferservice vom Volg lo liefere

 

 

Fitnessträning

Es lebe der Sport
Der ist gesund und macht uns hart
Er gibt uns Kraft, er gibt uns Schwung
Er ist beliebt bei Alt und Jung

 

E Winter lang schwitzt ou är bim Fitness
Träniert Koordination, Buch und Bei – was fürne Stress
Bim wohlverdiente Abschlussässe
grift är wacker zue und cha die Müeh vergässe
Es Glesli drzue, das muess ou sy
Är hets jo verdient, was isch de scho drby
Vorbildlech isch dr Massimo Cappellano
vo Choppige uf Höchstette mit em Velo cho
Bim Heifahre geits aber de nümm so rassig
Das Velo fahrt so komisch, das isch aber gspässig
Aes geit zick-zack, über Fäuder u Härdöpfufuhre
Irgendwie wott das cheibe Velo nümme spure
Die ganzi Fitness isch futsch, äs geit eifach nümm ring
Es paar Mou gheit dr Massi sogar ufe Gring
Mir hei do scho chli gschtudiert
was het me de dert e Winter lang träniert
We eim bire einzige Nacht
s Velofahre eso Müeh macht
Tüet doch drum bim nächschte Fitnessässe dra dänke
und lieber Isostar id Gläser ischänke

 

 

Gebisstouche

4 Lüt vo Willadinge
wei Ferie verbringe
uf Sizilie tüe si fahre
wei bade im Mare
Is Wasser geit dr Buri Fritz
und schwümmt wie dr Blitz
Eine Reise in den Süden isch für angeri schampar toll
doch der Fritz vo Willadinge het itz d Nase plötzlech voll

 

O Susi hani Päch gha
hätti doch s Muu nid offe gla
Beröies wie ne More
ha drum mis Gebiss verlore

 

Sie müess touche e ganzi Stung
Schliesslich finge si de die Zäng doch no untere Koralle ung
Doch dank em Buri Fritz
gits e nöii Sportart itz
Gebiss touche – das isch der Hit
Do machi aui Turischte mit

 

 

Dr Funkwecker

Am Morge früeh bini erwacht
ha de grad mis Kafi gmacht
Luege de zum Fänschter use
s isch so fiischter s duet mi gruuse
Ha scho d Schue und dr Mantu a
muess zur Arbeit ga

 

Scheuner Köbu bisch früeh dran
hesch du ke Uhr a der Hang
D Funkuhr spinnt und schickt die z gli
s isch erscht vieri gsi

 

 

Dr Wiehnachtsfänschter-Teppich

S Regi das het die Wiehnachtsstube erschaffa
Der Küsu dä het nümme chönne schlafa
Sie schön Teppich ligt drum dört
Das isch das wo ne stört
Frömde Schuedräck wott är nid drufha

 

Am Morge früeh no im Pijama
schliecht Bärtschi Küsu de zum Gmeindshus ana
Tuscht dä Teppich us
bi däm Gmeindshus
Und het vo dert a wieder chönne schlafa

 

Aber eis wei mir no gseit ha
mit dene Diebstähl ir Stube het är de nüt z tüe gha
Das finde mir würklich unerhört
das Lüt Sache nä wo ihne de nid ghört

 

 

D Streife-Füdle

In St. Niklaus bi Strits macht sech dr Peter dra
D Frouerige wott cho Boggiaspile drum foht är jetze a"
Tuet wüsche und tuet putze, poliert das ganze Huus
Am Schluss de ou dr Garte, macht jedem Gjät garuus

 

Aues muess perfekt si und wonär fertig isch
de gseht är ungerem Boum si höuzig Gartetisch
Dä chönnt är doch no striche, das passt de besser hi
drum chouft är bruni Farb und pinslet Tisch und Bänk grad i

 

Am nächschte Tag ischs heiss, und d Froue die si cho
Si gniesse dä schön Garte und s Bänkli im Schatte o
Si sitze gmüetlech dert und rüeme dr Peter lang
doch wo si schliesslech de ufstöh do wird’s ihm Angscht und Bang

 

Was isch passiert Strit Peter
Oje wie fürchterlich
Aui Frouefüdle si verziert mit eme brune Strich
D Farb isch bim heisse Wätter
haut nid trochnet gsi
U dr Peter isch mit Putze vo Füdle dranne gsi

 

 

Düngerpanne

Jetz hets am Thomet is Hirni gschneit
het doch dä Mitti April Grien uf d Strass gheit
Glattis chasch niene gseh
u ou Schnee hets gar niene meh
Bi gnäuerem häreluege
gsehsch dr Ueli grad chli flueche
Mit Bäse u Schufle duet Ueli schwitze
Dä cheibe Dünger ligt uf dr Strass u i aune Ritze
Z Unchrut het sicher danke gseit
für dä Dünger wo da isch häregheit

 

 

Skiweekend vom Turnverein

Dert äne i der Länk dört hei si es Fescht
Dr TV geit ga schine das isch für sie s Gröscht
S Lisi hett jetz Schmärze und aus duet ihm weh
S isch umgheit und bewusstlos doch das nid im Schnee

 

Nach em Schine go dusche der TV isch derbi
doch leider ischs ir Duschi de zimlich glatt gsi
Die Froue und Manne die rütsche jetz us
hei Prellige und Schmärze das isch doch e Gruus

 

Ir Duschi get der Gurki sich no chönne ha
doch dusse do het är de glich no Päch gha
rütscht dört us und bricht sich de ouno grad s Bei
der TV bringt die Verletzte vom Schiweekend hei

 

 

Merci vüu mau!

 

Liebi Fasnachtsfründe!

Härzliche Dank dass dir üs jedes Jahr vo Nöiem ungerstützet, sig das mit Gschichte lifere oder eme Bsuech a eim vo üsne Uftritte!

Nume dank euch aune dörfe mir jedes Jahr üsem Hobby fröhne und es nöis Programm zämestelle!

Merci vüu mau!

 

Und mir sie s ganze Jahr Abnähmer vo eune Gschichte:

 

tratschhenne@hotmail.com

Spritzer 2015

Luder Willy’s Not
D Sitzig vom Burgerrat im Gmeindshus isch verbi
Dr Hanspeter ladt is Flury i
D Manuela gspliesst die Türe vom Gemeindshus zue
schliesslich isch es Dunku und dinne isch Rueh
Was die Gruppe nid het gmerkt
Dr Luder Willy isch no dert
Chunnt zum WC us oh Schreck
Aui si weg

Atemlos durch die Nacht
brätscht är a d Türe das es Kracht
löt mi use i wott hei
füehle mi hie so elei
Atemlos und aus isch zue
cha kes Fänschter hie uftue
ha kes Händy grad derbi
jetz muess i haut do inne si

Dr Affolter Stefan dä walket verbi
ghört öppis lärme s muess e Ibrächer si
Muetig geit är uf die Gmeindstüre zue
gseht dr Willy dinne doch cha nid uftue
Seit am Willy s chunnt scho guet
i bi di Retter heb doch Muet
Doch er het kes Handy nei
doch er geit nid hei

Atemlos durch die Nacht
Walkt är zum Kindler s isch e Pracht
Lütet sturm he du muesch cho
Doch dä steit no im Pischi do
Atemlos duet uf das Schloss
D Tür isch offe dasch famos
Dr Willy cha jetz ou no go
Is Flury do si mir doch froh


Petra’s Rasedünger
Dä Rase muess me dünge
s Gjät nimmt überhang
d Petra Kindler macht das
isch voller Tatedrang
sie nimmt das Pack und streut das
im Rase vorem Hus
doch leider geseht me nach paar Täg
s Eländ dasch e Gruus

dr Rase dä wird geng wie brüüner
s Unchrut das isch wäg
doch leider ou dr Rase das isch doch e Schissdräck
Dr Gärtner muess es rette
das choschtet ziemli Gäud
mit däm muesch du haut rächne
wenns bim Läse fäut


Stäffe Uelis LED-Cherze
Är het es Zündhölzli azündet
und das het e Flamme gä
Und är hett für sini Cherze
wöue Füür vom Hölzli nä

Stäffe Ueli hättsch du gluegt de hättisch nämlich gseh
Das die Cherze nid cha brönne s‘isch e LED


Bines Wiehnachtsliecht
Chumm si wei es Liecht azünde
dass es häu wird i dr Nacht
Und dr ganze Wäut verkünde
das Wiehnachtsfänschter i sir Pracht

Z Willadinge söu das strahle
Jede söus bestuune cho
D Ruch Sabine tuet baschtle u male
wott nüt am Zuefau überloh

Tuet jetz no die Cherzli amache
E Houptprob die muess schliesslich si
D Flamme tüe sech schnäu entfache
s Fänschter isch glii Äsche gsi

Dr Wale löscht die Brandruine
D Bine die blibt cool derbi
stöut häre auti Pinguine
das isch Ruchs Wiehnachtsfänschter gsi


D Mäntigclub-Wanderig
Dr Mäntigclub dä wanderet scho
am Morge em Bill Tedu langsam dervo
Bim Raschtplatz ma dr Tedu
noche und är seit du
Jetz wanderi z Vorderscht vorab jawoll

Dr Tedu marschiert de aune dervo
gäng dr Nase nache s Ziu vor Ouge scho
Är het dr Gipfu erklunge
gloubt är heig s Ziu gfunge
Doch leider isch är du alleini gsi

Ufem Gipfu grad visavis was gseht är do
die angere Manne vom Mäntigclub stoh
E Abzwigig chli fausch gno
drum isch är nümm zur Gruppe cho
u isch ufem lätze Gipfu gsi


Wiehnachtsbelüchtig
Um d Wiehnachtszyt in Willadinge
Gits ächt es nöis Gwärb im Quartierli hinge
Ah nei s isch nume wie z Amerika
Dört tüesis ar Wiehnacht ou gärn chli farbig ha


Luder Ueli’s Baggerverchouf
Ueli gang und bring dä Bagger los
Ueli Luder fingt das ganz famos
Is Ricardo tuet är dä jetz stöue
Und do isch scho eine wo dä unbedingt hett wöue
Schribt am Ueli es Mail er wöu dä Bagger jetze ha
Er heissi Nelson Watson, us Aengland isch dä Ma
Ueli schribt: kes Problem mit 12000 bisch drbi
Meint di Sach sig erledigt und dä zahl de sicher gli.

Ueli jetz foht s Ganze ersch rächt aa
Wöu dä wott es Paypalkonto ha
Wott das Gäud am Ueli ersch denn schicke
Wenn dr Ueli ihm 800 Franke tuet vorstrecke
Doch am Ueli isch s nümm wohl fingt das Ganze sehr suspäkt
Do schribt dr Nelson wieder är heigi s Gäud jetz gschickt
Aer müessi aber sofort dä cheibe Vorschuss ha
Und scho sig Luder Ueli e ganz e riche Maa

Dr Ueli hett vili schloflosi Nächt
Aer fingt das aues eifach nid rächt
Dä Deal cha är nid verstah
Hetts de lo si und isch drum no jetz nid e riiche Maa

Liebe Ueli us Höchstette:
Du hesch sicher no nie so öppis erläbt, wei mer wette
Guetgläubig wi du äbe bisch
Hesch Du gar nid gmerkt, dass das e Gouner isch
Ricardo und Co si gar nöimodischi Sache
Drum tue doch dini Verchöif i Zuekunft per Handschlag mache!


S nöie Sofa
S nöie Sofa isch scho da
Dr Möbuwage chunnt scho
D Manne lade das jetz us
Doch träge sie s de ung is Hus
Mis nöie Sofa isch scho da
Doch leider wohni obe

Mosers reklamiere jetz
S Sofa das muess ufe
S Möbugschäft chunnt gar nümm drus
S Sofa ghört zu Bracks - unge is Hus
S gliche Sofa hei si bstellt
Wie chli isch doch die Wält


Fägis Autofahrt
Es isch e Filmriefi Szene ire Fritinacht
es isch Dunku und rägnet so fescht
s Fägi das wott jetze hei

Sie stigt is Auto mit der Julia i
wo füehrt mi dä Wäg jetze hi
der Parkplatz wott sie jetz verloh

doch wo geits jetze use
wo muess i jetz hi
sie gloubt das muess der Wäg sie
sie git Gas und fahrt dür das Loch

I fahre jetz d Stäge ab
das isch e Hit
Das macht doch mi Peugeot mit
Es rumplet und hopperet
Doch s geit aues guet
S brucht eifach chli Gas und chli Muet


Lüdis Bschüttifahrt
Bi üs z Choppige si d Strosse doch so grau
Bi üs z Choppige isch das haut ganz banau
Bi üs muess das nümme gäng so si
Itz chunnt dr Lüdi mit dr Bschütti


Dr Jürgu wott is Fäud use stresse
Doch hett är leider im Schuss vergässe
Bi sim Bschüttifass dr Dechu z schliesse
Und die Bschütti tuet uf d Stross use fliesse


Glory Glory halleluja
D Stross, die hett e nöii Farb itz gha
Wei mer e Gratis-Veränderig ha:
Dr Jürgu isch üse Maa



Grossratswahle
D Grossratswahle die stöh a
Do muess me aus Kandidat gueti Wärbig ha
So setzt sich s Schwimmbad Choppige und sogar dr Gmeindsverband i
Empfiut d Kandidate us em Gmeindsverband und wiest auf die hi
Doch chöi mir das irgendwie nid verstoh
Hei die nid die kompletti Lischte gno
Het d Badi und dr Gmeindsverband ächt Sponsoregälder übercho
oder hei si d SVP-Brille füregno
und mit dere gar nid gseh
das no angeri Gemeindsbürger kandidiert hei - oje


Luders Wöschmaschine
D Wöschmaschine die isch nöi, d Wöschmaschine die brilliert
drum wird si bi Luders i der Wärchstatt installiert
Sie wird grad belade und ou sofort in Betrieb gno
doch leider isch das nid so guet usecho
Die Wöschmaschine vo Dörus isch scho bim Schlöidergang
keis Wunder dass si zitteret u tanzet umenang
Nützt ou nüt we der Brack Räffu se duet beschwäre
me müesst d Transportsicherig vorhär haut entfärne


Yannik Kindlers Brille
Dr Yannik duet zum Optiker loufe
Er wott es poppigs Brillegteu go choufe
Gli fingt är eis wo zum junge Gsicht duet passe
Deheim chas dr Kindler Yannik de chum fasse

Ganz dr Pape ganz der Pape ja dr Papa het das ou
Ganz dr Pape ganz der Pape ganz genau
Ganz dr Pape ganz der Pape ja dr Papa het das ou
Ganz dr Pape ganz der Pape ganz genau


Schuebus
Si zwe Manne mit zwe Schueubus
e Dienschtfahrt go mache
Fahre ufe zu däm Schueuhus
und zdürab de Strasse nache
Luder Willy chunnt vo hing, Wälchli Otto chunnt vo vor -
und es ratteret und brummet umse ume dr Motor

I dr Erle isches äng
Si müesse chrütze so wi gäng
Otto dänkt: Willy a Rand
wüu süsch chunnt das unerchannt
Willy dänkt: Otto meh rächts
Süsch chunnt das nid guet süsch krachts -
und es ratteret no meh
s hett haut kene wöue gseh


S’isch nid zerscht Mou liebi Manne
D Sitespiegle si nümm dranne
Müesst i d Garage jetze springe
und mir tüe do drüber singe
Liebi Gmeind heitt doch Erbarme
mit dene beide Arme –
Müesst das Strässli breiter mache
süsch tuet das no mängisch krache


Billiet wäg
Lue mau dr Wägmeischter – dä wüscht vo Hang
Dä bringt kes Fahrzüg me i Gang
Lue dr Schürch Märcu s chunnt mer Spanisch vor
Dä fahrt nid mou me mit em Traktor
Lue mau dr Spängler – das isch dr Hit
Hautet sich mit em Flyer fit
Lue mau dr Grogg a – dä isch nümm schnäu
mit sim 40ger Elektromodäu

Was isch ou jetze i däm Dörfli los
Isch s ächt e Ökotrend das wär famos
Hei au die Manne s Autofahre satt
Doch mir weis verrote das isch gar nid glatt

Billiet wäg – ke Ökotrend ir Gmeind
Billiet wäg – d Elektra het doch Schwein
Billiet wäg – die Luft die isch jetz rein
Düet d Billiet wäg


Baumbärger Viggus Töfflifahrt
I bi mit em Töffli do
Helm und Uswies deheime glo
wott jetz no is Flury go

Plötzlich geseht är d Polizei
Viggu jetzt chasch nümme hei
Was machi jetze heiei

D Polizei die söu ihn nid entdecke
Duet s Töffli drum bim Flury verstecke
Und muess jetz leider z Fuess hei seckle


Schneerüümig Höchstette-Hellsau
Es schneielet, es beielet es geit e chüele Wind
U z Höchstette/Hellsau ligt meterhöch Schnee uf
De Strasse u es wird nid Schneegschnützt
Keine Sau ruft mich an, kein Schwein interessiert
sich für mich…
Ke Wunder, we beid Schneeschnütz-Verant-
Wortlechi glichzitig i de Ferie sie


Dezämber-Termine
Ig bi no ganz kaputt vom Dezämber. Cha mi fasch nümm erhole. Oh du besinnliche Wiehnachtszyt.

Warum bisch am 29.11. z Willadinge am Wiehnachtsmärit gsi?

Oder wägem 30.11. em Liechterfescht im Wohn- und Pflegheim?
Das isch emu nid so tragisch!

Ja das scho nid aber am 6.12. wo dr Samichlaus isch cho hani am Namittag scho a Jodlerabe müesse.

Ah ja gäu dä vom Jodlerclub Heimat, nid z verwächsle mit däm e Tag später ir Chiuche vom Jodlerclub Bärgbrünneli.

Aha der Jodlerabe vom Jodlerclub Heimat hani ig haut am 12. und 13. Dezember gnosse.

Denn hani ebe nid chönne wüu denn bini am Konzert vor Musig ir Chiuche gsi.

Du hättsch ja ou am Sunntig a das Konzärt chönne!

Nei denn isch ja dr Wiehnachtsmärit ir Badi gsi.

Dört hani ebe nid chönne ga wüu ig im Vorverchouf kes Badiabi ha kouft.

Do hättsch ou ohni Abi chönne ga!

Auso ig bi emu froh gsi hani eis gha de hanis i dere Saison wenigschtens einisch chönne bruuche.

Und ig säge euch au die Adväntsfänschter und –liechter si ja im Dezämber ou no derzue cho! Choppige, Auistorf, Höchstette/Hellsau und Willadinge.

Jo und z Willadinge bini irgendwie geng am fausche Ort häre wüu der Terminplan nid gstumme het.

Apropo Wiehnachtsfänschter…blib du mau schön hocke..


Schlusslied
Lue die Henne wo düe tratsche a dr Fasnacht i däm Dorf do
die si jetz grad verbi

Lue die Nase vo de Gsichter vo de Henne wo düe tratsche a dr Fasnacht i däm Dorf do
die si jetz grad verbi

Lue die Buebe wo hei d’Farb do uf d’Nase vo de Gsichter vo de Henne wo düe tratsche a dr Fasnacht i däm Dorf do
die si jetz grad verbi

Lue die gschickte chline Wybli wo hei gstickt die fine Libli vo de Buebe wo hei d’Farb do uf Nase vo de Gsichter vo de Henne wo die tratsche a dr Fasnacht i däm Dorf do
die si jetz grad verbi

Und wenn dir weit e Foto mache vo de gschickte chline Wybli wo hei gstickt die fine Libli vo de Buebe wo hei d’Farb do uf Nase vo de Gsichter vo de Henne wo die tratsche a dr Fasnacht i däm Dorf do

de sit dir ds spät
warum?
die si jetz grad verbi!


Matthias Sempach
Dr Mättu Sempach – das hei mir dörfe vernäh
hett das letschte Jahr ou wieder aues gäh
Z Chiuchbärg hett är obenus gschwunge
und viu Ehr i sis Dörfli brunge
Eis wie mir säge:
Dr Mättu cha niemer so schnäu ufe Rügge lege
Nume eine hett ihm chönne d Stange ha
Öpper hett sis Transparänt mit eme 10i umgla


Traktor-Jöring
Euro-Krise und Co. do chöi mir nume lache
Gang nach Auistorf, dert chasch originelli
Schiferie mache
S isch einmalig und duet nid viu choschte
Muesch di für das ou nid vor ne Schilift moschte
Nimmsch e Traktor und fahrsch hinge uf de Schi mit
Ski-Jöring à la Renfer Mänu: das isch der Hit

Spritzer 2014

Bisliverbot

Z Bärn si sie a d‘Fasnacht
und hei de zimli Not
müesse jetze bisle
wos eifach haut grad got
uf em Münschterplatz geit das doch
sie mache sich parat
doch leider chunnt jetz d Polizei und fingt das zimli schad
Dr Gümpu dä muess jetz go bisle
dr Mäthu ou no grad
dr Stefan wott jetz ou no
das isch jetz cheibe schad
wüu z Bärn isch das verbote
bim Münschter darfsch das nid
zwe chöi no flieh vor Polizei bevor’s jetz Buesse git
90 Franke muess är zahle
dr Gümpu fingt das krass
Ig ha doch noni ferti bislet
es isch doch chum chli nass
Die Flüchtige hei Bedure
s schlächte Gwüsse blogt se so
sie chöme zrügg und zahle de
die glichi Buess ou no
Dr Gümpu dä muess jetz go bisle
dr Mäthu ou no grad
dr Stefan wott jetz ou no
das isch jetz cheibe schad
wüu z Bärn isch das verbote
bim Münschter darfsch das nid
drum göt doch s nächschte Mal a ne Ort
wos das günschtiger git

Aebis Swimmingpool
Nach em Pisse chunnt der Aebi
dr Res fingts nid cool
dr FC brucht aus WC
si schön Swimmingpool
Aer secklet vor Verrückti
wie ner isch hingedri
i Schlarpe ohni Hose
foht sech e Zerrig ii
Duuli duuli duulidu
Das muess doch schmärzhaft sii

Fleischknappheit
Sie düe zum Zürcher loufe
und hei es grosses Ziel
sie wei go Hackfleisch choufe
das bedütet ihne viel
D Baumberger- und d Graber Nice müesse leider gseh
Ir Vitrine hets nur no eis begärts Objekt oje
Die einti seit das isch jetz mis
und wott das Päckli nä
Die angri seit das isch jetz fies
das muesch du mir jetz gä
Bevors no Krach git grift d Bedienig jetze sofort i
springt schnäu zum Garius hout no eis das isch de d Lösig gsi
Am Schluss si die zwe Froue jetze froh
chöi zäme näbem Garius düre heizue goh
Sit der Wagner sini Metzgerei het gschlosse
wird am Änd no wägem Fleisch uf nang gschosse

Käser Lisi’s Problemlösig
I fahre mit mim Outo - is Parkhus haute a
Dr lingg Arm i dr Schlinge -wie söu das jetze ga
I bi z Chäser Lisi -u löse jedes Problem
und überchume locker - mis Parkticket bequem
La z Fänschter langsam abe - mues nid mau überehange
nime z Bilie mit rächts - dank mire Grillzange

1. Augusfeier Willadingen
Trittst in Willadingen daher
am 1.August freut sich jeder sehr
bei Bratwurst und Bier, singen wir
Wenn das Feuer sich langsam rötet
und jeder Willadinger betet,
dass der Bschütti-Gestank
dass der Bschütti-Gestank
doch endlich aufhört, doch endlich aufhört
Dr Thommet Stephan zettet si Mischt
ums 1.Ouguschtfüür, und das zum Leid vo de Gescht
Hätt me doch besser kommuniziert
De hätt me die Tische nid uf däm bschüttete Fäud platziert

Aspi-Bärge
Dert änet em Aspi dert chunsch nümme drus
Die Hügle si mächtig u scho fasch e Grus
Ir Gmeindskasse isch Ebbe – das duet üs so weh
mit Stüre die füue, das chöi mir nie meh
Mir wüsste was mache, das bringti vüu Gäld
E Skilift bringt Turischte vor ganze Wält

Lüdi Tinu‘ Parkierkünscht
Dr Lüdi Tinu fahrt ganz flott
wüu är zum Aebi Küsu wott
parkiert si Jeep und so
isch är is Unglück cho
är stigt us und merkt gar nid
das es no e Handbräms git
a däm Hoger wärs no schlau
jetz lueg e mau
I sueche hie und sueche dört
I sueche überau wie gstört
Dä cheibe Jeep isch plötzlich niene meh
Das duet mer weh
Chane niene gseh / Ojemine
Uf dr Chrüzig ungedra
hets e schöni Insle gha
mit Blüemli vouer Pracht
doch scho hets kracht
Dä Jeep dä rolllt elei
dr Hoger ab o nei
i die Stange wo dört steit
het der Jeep zämegleit
Die Stange isch jetz chrumm
der Tinu luegt ganz dumm
är cha das nid verstoh
muess z Fuess hei goh
macht ne gar nid froh
doch es isch e so
es isch e so
Do derzue wei mir no e Bemerkig mache
und das isch de nid öpe zum Lache
Lieber e stehende Renault bim Daniel Ritter
als es rollends Auto dürs Dorf, das isch bitter

Kummlis Ehering
Dr Kummli het si Ring im Abfluss verlore
Das macht ne hässig wie ne More
So facklet är nid lang
Nimmt das Syphon grad usenang
Es isch ihm würklech glunge
Är hett si Ring wieder gfunge
Nimmt ne use u leit ne aa
Hett aus verrumt u wieder dra taa
Dä Ehering juhee
So glänzig wie us Schnee
dä isch wieder fürecho
jetz isch dr Ädu froh
Doch nach churzer Zit oje
gseht är si Ring wieder niene meh
Luegt sini linggi Hang aa
dert isch ke Ring me draa
Dä isch äuä wieder i Abfluss abe gange
so hett är wieder vo vore agfange
Hett aues usenang gno
doch im Syphon isch ke Ring fürecho
Dä Ehering hurra
Isch schliesslech wieder da
Aer hett ne nämlech am Finger dran
Nume leider ar angere Hang

Der vergässnig Uswis
Albrechts si in Italie acho
hei der Uswis im angere Outo deheime glo
Wüu so ne Uswis wichtig isch und muesch ha
lüte sie am Scheidegger Rosi i d Schwiz a
Gang der Uswis go hole und schick üs dä
du muesch ne eifach us em Outo nä
Das Auto isch aber verriglet und zue
drum mues der Cesu cho häufe uftue
Wie ne Verbrächer bricht är das Outo uf und wird belohnt
het sech ächt dä Ufwand würklich glohnt
Bis Albrächts dä Uswis in Italie hei gha
si d Ferie düre und sie si scho fasch wieder da

Drüeggclub-Reisli
Oje Dr Drüeggclub wott wider mou uf Reise goh
Sie wei i Jura und hei drzue es Büssli gno
Mir wüsse scho
dass das nid guet cha usecho
Am Afang isches guet gsi
Sie si aui nüechtern gsi
Sie schwöre das Mou passiert nüt doch s blibt de nid drbi
U chehre i jedes Beizli
links u rächts grad ii
Jurassische Wii
isch so guet u süffig chumm schänk mer ii
Und wenns mir de schlächt wird ligts de do dra
dass i gnue gsoffe ha
u nümme ma
Jurassische Wii
Aui Manne göh go chotze stige wider ii
nach paar Kilometer rüeft dr Mutz: hautet aa
S’ cha si dass i öppis verlore ha
S’isch nümm da
Wägem Fredi Frick alias Mutz
müesse di Manne jetz umchehre gottfriedstutz
Dr Chotzplatz hei si schnäu wieder gfunge
Hei sech dür die Sosse düregrunge
Nach paar Minute rüeft eine: Hurra
Am Mutz sini Zäng si wieder da!

Schwingerkönig
Mir Schwinger heis luschtig
mir Schwinger heis guet
dörfe zwüsche ine ou mau bös si
hei darum vüu Muet
hudriia holleleia hudriia holio
Jetz hei mir e ganz Böse ir Nachbarschaft
dr Mättu isch jetz König het aui grad gschafft
hudriia holleleia hudriia holio
Dank Dopingkontrolle hets ou der Dick Chrigu gmacht
e Chranz und e Chrone das isch doch e Pracht
hudriia holleleia hudriia holio
D Auistörfer düe sones Fescht guet plane
drum hange scho 2 Monet vorhär wieder ihri Fahne
Die Hauptprob het sich aber jetze glohnt
wüu ja jetz schliesslich no e König meh i ihrem Dorf wohnt
Schwingerkönige, schönschti Bure, e OK-Präsi und Nationalrat
Z Auistorf stöh die au parat
D Choppiger si niidisch und frage sech scho
was hei ächt die Auistörfer is Drinkwasser do
Sie sueche jetz ou nach eme berüehmte Ma
und hei de schliessliche ou eine gfunge gha
Zwar chönnt me dr Probst Michu nid Schwingerkönig nenne
aber aus Pommes-Frites-König chönnt me ne i Zuekunft kenne

Bieris E-Bike-Tour
Uf d Biketour wei si go
Bieris si so froh
Dank E-Bike geit das nämlich zimli ring
Sie miete so eis grad
und schwinge sich ufs Rad
doch leider geit das plötzlich gar nid gschwing
Dr Akku isch kaputt
Dr Tinu wird verruckt
Wie söu ig jetze uf dä Hoger cho
Sie näh e Droht vom Hag
und binge dä as Rad
und hei dä Bitz aus Abschleppseili gno
E-Bike miete lohnt sich nid mis Schätzli
S Ursi muess ne jetze ufe zieh
E-Bike ohne Akku macht nid happy
E-Bike choufe die zwöi darum sicher nie

Rouchverbot
Aus Schwizermeister bi de Hornusser muesch sportlech si
Wenn träniersch und gsung läbsch bisch dert drbi
Öpis passt aber irgendwie nid und chöi mir nid verstoh
Im Vereinslokau heisi jetze z Rouchverbot wider usegno
Vo settigne Trainingsbedingige si mir starch beidruckt
Mit däm Näbu mache si villich dr Gägner ganz verruckt
Wüu dä dr Nouss gar numme cha gseh
Wird Höchstette no lang Schwizermeischter blibe juhee
Vor luter Näbu i däm Lokau het der Grütter Beat äuä nid gseh
wie mängs Glas är drunke het oje
Aer fahrt jetz chli kurvig hei
Uf sim Husplatz wartet scho d Polizei
Dr Schegg isch är jetze los
Jetz chan är suufe so vüu är wott dasch famos

Baumberger Nicoles Transport
Sie geht heute aus wieder mal ins Kino gehn
Mit Thesi und den Kids einmal einen Film ansehn
Dann kommt dieser Mann und fährt sie von der Seite an
Auto ist kaputt ruft die Polizei mal an
Der Freund und Helfer kommt sofort
klärt die Situation vor Ort
Nein ihr Auto ist jetzt Schrott
Mein Herz das brennt wenn ich das seh
Will doch heute noch ins Kino gehn
Mein Herz es brennt so lichterloh
Thesi und die Kids sind schon im Kino
Mein Herz es brennt wenn ich hier steh
Wie soll ich jetzt ins Kino gehn
Mein Herz es brennt total frustriert
Brauche jemand der mich hin chauffiert
Die Polizei sie ist so nett
sagt dass sie noch ein Plätzchen hätt
Nicole Baumberger steigt hinten ein
ein Gefängniswagen soll es sein
Fährt wie ein Dieb zum Kino hin
sogar ein Foto liegt noch drin
Ihr Herz es brennt so lichterloh
und fragt die Polizei „Gäuet ig mache no es Foto“

Bänzindieb
Der Pauli Rolf überchunnt Bsuech vor Polizei
Dir heit einisch tanket und nid zaut heieiei
Der Rolf isch äuä chli verwirrt gsi
Geit nach em Tanke i dä Shop dri
Chouft sech no e Schoggola
und het derwile grad vergässe gha
dass är ja näbem Schoggi ou no z Bänzin het bezoge
Fahrt ohni z zahle hei und niemer luegt ihm noche
Aber jetz Monate später hei si‘s no gemerkt und är het der Dräck
Muess im Schloss atrabe und het es schöns Bigeli Schinli wäg
Rolf mir wüsse ja dass du ganz bestimmt kei Dieb bisch
Aber mit em Auter isch me im Chopf haut äuä nümm so früsch

Sicherheit
Sicher chasch doch uf em Trottoir si
dänkt sech s Hanni Läng doch das isch‘s nid
Wird agfahre bi sich vorem Hus
Vo was chunnt si im Momänt nid drus
Es Behindertefahrzüg het se grammt
Die Gfahr het si nid erkannt
Der Herme Werner isch chli zackig ungerwägs gsi
Z Choppige chasch vor gar nüt me sicher si

Elektro-Auto
Dr Grogg Chrigu wott es Elektro-Outo choufe
Für z gseh ob dä Chare guet tuet loufe
Isches doch am Beschte
Me tuet das Gfährt zersch chli teschte
I sire Euphorie
Geit är e chli z schnäu dri
fahrt mit eme 60er i ne 30er Zone
Und wird blitzt, das tuet sech würklech nid lohne
D Buess hett de schliesslech d Garage Affolter übercho
Wüu uf die lutet jo no s’Outonummero
Oje Chrigu – statt im tolle nöie Outo
Hocksch du ir nächschte Zit vielech ufeme Velo
Doch uf öppis chasch du würklech stouz si
E besseri Wärbig gits nid für di schnäui Elektro-Technologie

Danke
Mir danke euch vo Härze
sit dir no aui do
10 Jahr chöit dirs verschmärze
das macht üs würklich froh
Tratschhenne si mir gärn
und chöme wieder zrügg
Die näschte 10 Jahr hoffe mir
das sigi eues Glück
Ar Fasnacht muess me eifach dichte
das macht üs riese Spass
dir verzöuet üs die Gschichte
drum wüsse mir haut das
mir danke euch vo Härze
dir machet üs ganz froh
und hoffe fescht dir siget de s’nächscht Jahr wieder do