Spritzer 2017

Fingerbeeri wäg (Polo Hofer Stüehl ewäg…)
Lue mau dä Esu, isch's nid e Pracht?
Für‘s Chlaue schniide, isch dä parat gmacht
Dr Tierarzt Chiuchema, das isch nid nöi
Geit für aui Tierli, sogar id Chnöi

Sis nöie Mässer setzt är bim Esu a
Sones Chlaue-Schniide het är scho lang nüm gha
Für sones Schniide, lat är aus la schta
Är muess nid warte bis är cha afa:

Doch was passiert!

Finger wäg
Das duet doch cheibe weh!
Finger wäg - Hans hesch das nid gseh!
Finger wäg – s blüetet ojeminee!
Dr Finger dä isch wäg!

Ja, sone Finger wäg, das isch nid guet
Das choschtet potztuusig sofort viu Bluet
Da hiuft zum Glück nur, das weiss jede Goof
Sofort i Notfau, uf Burgdorf.

Doch dadrfür, isch Hans gar nid z'ha
är duet lieber, zum Lorenz ga
Dä näiht im ds Fingerbeeri grad wieder a
Da muesch gar nid zume Husarzt ga:

Finger wäg
De chasch zum Tierarzt ga!
Finger wäg- dr Tierarzt näit dir‘s a!
Finger wäg – dr Tierarzt isch di Ma
Ja das chasch günschtig ha!

Spielgruppe (Chline, schöne Silberstärn…)
Thomet Stefan hout dr Max
Us dr Spiugruppe – s‘isch e Klax
Wott dr Xavier nid im Outo lah
Lat ne drfür ir Spiugruppe la stah
Nimmt nume Max mit sich hei
Eis oder zwöi Ching – isch einerlei…

Bänzin-Panne ( 1000x berührt…)
Är wott no zum Tanke i d Landi ga
U dänkt nid im Troum, dass öpis passiere cha
Är weiss nid wie lang är das scho duet nutze
Füert i Tank dä Ifüustutze
Dr Zurfluh Heinz lat z Bänzin la fliesse
U duet di Zit im Wage gniesse
Fahrt plötzlich furt, dänkt nümme dra
Dass är dr Stutze no im Loch duet ha

1000x igfüehrt
1000x isch nüt passiert
1000 u einisch gmacht
U när hets Zooom gmacht

Die Tanksüle hets mehreri Täg zum Verchehr us zoge
Was dass dr Heinz uf‘s Unfauformular gschribe het, da müesstme ihn grad säuber froge…

Füürwehrmagazin (Mir si vo dr Führwehr)
Mir si vo dr Führwehr, Höchstette u Hellsou
Es Führwehrmagazin, ja das hei mir ou
Mir wei das restouriere, hei aber fasch kei Gäud
Mit nöier Farb am Tor, isch‘s schönschte vo dr Wäut

Gartmann Bruno dr Gmeinspräsi, kennt sich prima us
Bringt freiwiuegi Häufer, sofort zu däm Huus
Si schwinge dr Farbpinsu u es isch es richtigs Gschmier
Mache när es Feschtli, zur Iweihig mit viu Bier

Bir nächschte Fürwehrüebig, öffne si de ds Tor
Dir gloubets aui nid, steuet öich das vor
D Gipsplatte si vor Dechi gheit uf d Grätschafte-oh Gott
Ja spare u renoviere sött me nid am fausche Ort

Lüthi Ruedi (Sprützer)
Dr Lüthi Ruedi überchunnt es SMS: Pass uf-in Willadinge hets e Blitzer!
Doch Ruedi brucht vermuetlich no es Passfoto, u fahrt dür Willadinge wie e Flitzer …

Wägi Garage-Gschicht (Hingerem Hus und vorem Hus....)
Garasch boue, Garasch boue
Tuet “Highlander-Wägi“
Für si nöi Grossrumwage
Isch tagelang drbi

D Garasch steit jetz, d Garasch steit jetz
Wägi luegt glücklech dri
Wott sis Outo inefahre
D Garasch isch aber z chli

Wägi chouf dr doch s nächscht Mou e Cinquecento!

Steffen Giele Pneuwechsel (Märitfroueli)
Es wei 2 Giele id Wärchstatt go, Wärchstatt go
Wei Summerpnö für‘s Outo
Tralalalalalala

Güschtu und Vali si nid schwach, si nid schwach
So Pnö dra tue isch doch kei Sach
Tralalalalalala

D Schrube hei ne leider gfäut, leider gfäut
Drum hei si ou grad nöii bschteut
Tralalalalalala

Montiere di Pnö sofort am Chare, sofort am Chare
Wei nächär wieder heizue fahre
Tralalalalalala

Ar Friedou-Chrützig gits e Schreck, gits e Schreck
Aui Pnö fahre plötzlech wäg
Tralalalalalala

Ohni Pnö steit ds Outo do, ds Outo do
Dr Küsu muess mit em Stapler cho
Tralalalalalala

Stäffe Giele si guet im Schwinge, guet im Schwinge
Tüet‘s Outo gschider zum Fachmaa bringe
Tralalalalalala

Käser Remo (Schacher Seppeli)
I bi dr Käser Remo
Im ganze Land bekannt
Im Schwinge hani mänge gno
Das macht mi intressant
Für mi Sponser dueni Öpfu ässe
verdiene ganz viu Gäud
Drum wotti itze uszieh i di grossi witi Wäut

Und zügli de uf Choppige,
steit breit dr Kindler do
Är rüeft mer zue: Hey sälü Remo
itz bisch du ändlech cho
Sone populäre Ma, s isch geniau
Do chöi mir itz brilliere
Weni Stüüre und e Munistau
Wei mir dir garantiere

Aus erschts chunnt z Schwizer Farbfernseh
Und Glanz und Gloria
TeleBärn hei mer ou scho gseh
Und d Groupies si ou da
Am Schwingerempfang das isch doch klar
Do hei mir ou mitgmacht
Ja sone Promi isch wunderbar
Mir si berüehmt das isch e Pracht

August-Füür (Kriminaltango)
Kriminaltango in den Gemeinden
Dunkle Gestalten und ein helles Licht

Z Erschtouguschtfüür in Heusou
Isch parat für di grossi Schou
D Manne hei das Füür ufgrichtet
Wohär isch‘s Holz - das isch nid wichtig
D Gränze tüe si nid beachte
D Auistörfer tüe sich achte
Heusou het das Houz doch gstole
Drum wei mir für das chli Chöle

Kriminaltango in den Gemeinden
Dunkle Gestalten und ein helles Licht

Heusou wott vo däm nüt wüsse
Doch si müesse de hert büesse
D Auistörfer mache ke Witz
Drum breichts Heusou wi dr Blitz
Am 31. Juli töif ir Nacht
Do brönnt das Füür es isch e Pracht
Wär dä Täter isch gsi
Wüsse mir haut leider nid

Doch mir gäh öich hie üse Rat
Auistorf stöuet das Jahr e Security vor öiem Füür parat
Heusouer tüet am beschte z‘Houz bewache
Und d Choppiger, die chöi nume drüber lache!
Wöu ihres Füürli, das brönnt schüch und chlin
Ir Badi ihre Füürschale in!

Gemeinderat Koppigen (Schwäbsche Eisenbahn)
Schneider Schneider Schneider Schneider
Isch itz witer uf dr Karriereleiter
Gmeinratspresi isch är itz
Und leitet nöi dr Vorsitz

Dr Richard Aebi das isch nid nöi
Dä blibt sim Ressort lieber tröi
Im Job do muess är sehr viu füehle
Drum wott är im Tiefbou im Dräck go wüehle

Dr Bärnhard Res ligt nid gärn ufem Ranze
Är schaffet lieber mit Finanze
Nötli zeue macht är gärn
Gäud usgäh das ligt ihm färn

Ou d Joscht Karin die blibt drbi
Wott witer soziau und gsung si
E Kita chasi düre bringe
Wenn wird ere d‘Mehrzwäckhaue glinge

Vo Friedhoflöcher het Beat gnue
Wott drum bim Hochbou si Sänf drzue tue
Bi Entscheidige wirds mängisch äng
Zwüschine bruchts de Hoor uf de Zäng

Erziehig, Biudig, Kultur u Sport –
Gopferdeli isch das es cheibelängs Wort
Doris Longerich Stadler isch üsi Frou
Das passt zum länge Name ou

Dr Rüttima Bärnhard cha glücklech si
Nach zwene Alöif isch är doch drbi
Me hett ne jo nid chönne abwähle
Drum tuet är sech itz dür d Ortsplanig quäle

Tralla tralla tralla tralla
Mir wei doch nümme stiui Wahle
Gmeinratswahle die si dr Hit
Drum mache s nächscht Mau aui mit

Bim TV hets de viu meh Bewärber umenang
Dert hets fürne Bisitzerjob im Vorstang
Sogar e Kampfwau unger de Mitglider gäh
D Gmein sött sich do es Bischpiu näh
Und viu meh schmiere u investiere
Damit si ihri Kandidate nid a TV tüe verliere

Katzefueter (Sprützer)
Bakas Georgios isch ar letzschte Fasnacht
Zum Übernachte bi öperem z Gascht
Am nächschte Morge macht är sich ir frömde Chuchi
Nach öpisem zum Ässe uf d Suechi
Schlaftrunke dänkt är: Das müesse Flöckli si
Aber leider sis äbe Brekkis gsi

Auistorf Schweine (Sprützer)
D Auistörfer die hei Schwein
Überchöme 700 Iwohner meh i ihri Gmein
Doch Stüürinahme cha me vo ihne nid erwarte
Si göh ou nid i früsch renoviert Chindergarte
Chasch se höchschtens nach paar Monet am Spiessli brate
U d Bewohner vo Auistorf si sech drum zünftig i d Hoor grate
Dr Bouherr vo dere Söilihaue
Däm tuets im Gmeinrat und im Gmeinsverband ou gfaue!
Är isch nämlich zueständig für Kadaver und Personau
Mir finge das eifach geniau!

Anna Müller (Hansjakobli u z Babettli…/ Am Morge früeh…)
E Gschicht vom Schnitterfritig….
Dr Stefu und d Anna Müller
Wärde am Friti gäng wie föller
Sie wei sich ufe Heiwäg mache
passierts, es isch nid zum Lache

Mit em Velo fahre isch nid eifach
Drum krachet d Anna grad i Öschbach
D Brüue isch nüm ufem Gring
Es fäuht ou no dr Ehering

Ir Nacht die Sache sueche
Da chasch doch eifach nume flueche
Truurig fahre sie jetz hei
Es isch doch aues einerlei

Am Morge früeh wenn d Sunne lacht
Het d Anna sich zum Bach häre gmacht
Suecht nach dr Brüue und em Ring
Das geit aber gar nid gschwing

Plötzlech gseht si ihre Brüue dert
Leit se a es isch nid verchehrt
Gseht im Bach dr Ring brilliere
Di Ehe cha witer existiere

Längs Flugzügproblem (Campari soda)
I nime no e Campari Soda
Wär doch so gärn überem Wulkemeer
Hockti lieber z Gran Canaria
U schlürfti dr Drink am Meer

Läng‘s warte mit länge Gringe
Ihre Flüger rollt drvo
S het nüt gnützt no chli z springe
Sie si z spät acho

Jürg du söttsch haut nid plagiere
Ou wenn e Pilotin hesch zur Frou
Muesch di besser organisiere
So wi mänge angere ou
Aus moderne Züg nützt nüt
Wenn‘s nid richtig funktioniert
Es isch eifach nid so gschid
We me dr Wecker fautsch programmiert

Laubsuger (99 Luftballons)
Dr Gerber Stefan het grad Zit
Ds Loub wägzmache wo ume ligt
Är het es Super-Grät drzue
Dr Motor startet är im Nu

99zg Bletter sugi
Mit mim nöie Loubsuger
A mim Rügge hanget z Grät
Vor mir sugi aues wäg

99zg Bletter flüge
Dür d Luft gsehsch se schwäbe
Hinger mir am Bode zue
Ha vergässe dr Rissverschluss zueztue

Dr Zuun isch wäg… (Sprützer)
Dr Frutschi Bärnhard striicht tagelang si Zuun
Ime unheimlich schöne bruun
Da chunnt dr Künti mit de Boumaschine azmarschiere
U duet für d Strass z renoviere dä schöön Zuun grad abmontiere…

Physio Steffen (Sprützer)
Lache isch die beschti Medizin
Das weiss ou z Stäffe-Physio-Team
D Arbeit wird immer guet gmacht
Aber bim Schaffe wird ou mängisch glacht
Wenn‘s Zit erloubt, wird es Kafi abegläärt
U drzue vo dene vilne gschänkte Süessigkeite begährt
Dr Jörg wott sich bim Paziänt ufs Stüeli setze
Rätsch ertönts – u är merkt mit entsetze
Sini Hose die hei im Schritt grad laga
Gottlob het är nid die nöischte Jeans annegha
Zum Glück chame sich bim Lache ke Überdosis hole
U am Jörg wärde de Jeans mit Stretch empfole

Skiclub 500 Fiat (Mani Matter: Wilhelm Tell / Aues fahrt Schi...)
Dr Schiclub Fortuna dä hett es grosses Ziu
D Jubiläumsreis go gniesse das bedütet ihne viu
Id Oschtschwiz tüe si fahre, gniesse s Ässe u dr Wy
Das isch dr Afang vore länge Episode gsi

Ir Pizzeria gseh si e aute Cinquecento stah
Es wär e grosse Troum ou sone Fiat z ha
Je lenger dr Abe gange isch je meh fliesst ou dr Wy
Und plötzlech isch dä Cinquecento ihres Outo gsi

Es paar tuusig Franke – si schnäu sech einig gsi
Dr Sutter tuet no märte, mit em Wirt schlöh si när ii
Mit no meh Wy begiesse si de dä spontan Vertrag
Aui si si häppi gsi  - s‘isch z‘Schönschte vo däm Tag

Si hei dr Rusch usgschlafe gha - beröies scho e chli
Isch de das ou würklech di beschti Entscheidig gsi
Dä Cinquecento chunnt paar Wuche speter z Choppige a
Und aui Schiclub-Mitglider di stöh bi Längs scho da

E Laschtwage fahrt jetzt häre ladt das Chäreli us
Aui teschte grad das Outo und fahre rund ums Hus
Fahre vorwärts mängi Rundi, immer rundherum
Dr Rückwärtsgang dä geit drum nid das isch äbe chli dumm

Es Vereinsouto das isch jo klar, söt e Schiclub ha
Doch was nützt das, wenn das im Winter gar nid fahre cha
Drum tüet am Beschte bi sore Reis nume Wasser trinke
Damit dir de bi somne Deal no rächtzitig chöit abwinke

Aues fahrt Schi, aues fahrt Schi
Nume dr Schiclub nid
Nie bringsch di Schi, nie bringsch di Schi
I Cinquecento drii

Seniorenreise….(Sprützer)
Dr Gmeindrat und dr Burgerrat wei d Seniore ir Gemeind ungerhaute
Scho bir Iladig, verrate si nid ganz aues u düe paar Infos no für sich phaute
Frage über Frage steue sich die ältere Lüt
Nöi gits es Zmittag ire Beiz irgendwo aber vome Zvieri steit da nüt
U warum faht de das Reisli jetz in Willadinge a?
Düe die dert jetz ou es Schueuhus ha?
Nenei, das isch e Schribfähler ir Iladig gsi – eine vo vile
Dr Gmeindrat duet die Fähler aber chli abespile
Sone Senioreusflug isch doch dr Hit
Da gits viu z rätsle u aui zäme blibe im Chopf no fit…

Niederhäuser Res: nöii Turnhose (Sprützer)
Füre Sport isch dr Niederhäuser Res immer z ha
Drum tuet är ou is Drüeggclub-Turne ga
Leider si sini Turnhose deheime blibe
Dr Res muess drum es paar angeri uftribe
Imne Rüümli gseht är e frömdi Sporttäsche umestah –
Dert muess es doch öppis drinneha!
S Turne tuet är schliesslech imne Frouehösli absolviere
Mir wei do gschider gar nid nochestudiere
Schmöcke tüe di Hose nachem Training de wider guet
Wüu se dr Res mit sim Deo iispraye tuet

Schlitte-Gschicht (Sprützer)
Dr Joel Zingg isch im Länggi am Schlittle gsi
Plötzlich cha är nümm brämse u fahrt grad i Öschbach dri
Nachere spektakuläre Rettig isch är wider troche gsi
Doch dr Schlitte schwümmt no im Bach: Isch dä jetz hi?
D Susanne rückt mit em Outo u dr Schneeschufle us
Doch si bringt dä cheibe Schlitte gopferdeli nid zum Bach drus
Todesmuetig springt si dri
U zum Glück isch am Schluss dä Schlitte grettet gsi
D Susanne weiss sit dere Gschicht
Ihri Winterschue si würkli wasserdicht!

Fleisch abhole à la Heinu Wettstei (Sprützer)
Fleischplattene vom Garius si dr Hit
Do macht ar Wiehnacht jede mit
Zwöi Stück go abhole sött ou dr Heinu Wettstei
Doch di Plattene z Fuess heiträge – ne nei!
Är hout sis Outo und tuet di 30 Meter zum Garius fahre
Doch leider steit uf jedem Parkplatz bereits e Chare
So fahrt är bir Metzg verbi
U stöut s Outo bir Poscht hi
Schleppt di Plattene de 30 Meter zu sim Gfährt
Bevor är di 60 Meter wider heizue fahrt!

Eventmanager Meischter Ruedi (Sprützer)
Es Fondue nachem Training wär doch dr Hit
Do macht jo sicher dr ganz Drüeggclub mit
Dr Meischter Ruedi nimmt di Sach grad id Hang
Das isch doch e Klacks, är brucht nid lang
Dr Chäs, dä söu dr Ruch Res bringe
Und im Freiehof wärde si sicher no es Plätzli finge
Dert isch me ab dene späte Gescht aber nid grad froh
Si hei ou kes Fonduecaquelon und kes Röschoo
Leider het dr Ruedi ou no s Brot vergässe
Und ohni das isch es Fondue zimlech troschtlos zum Ässe
Ruedi du hesch Talänt wi ne More
Aber zum Eventmanager bisch du nid grad gebore!

Reise- u Idäntidätsproblem (Sprützer)
Z Abloufdatum vom Pass sött me vor ere Reis kontrolliere
De müesst me nid ir Panik no schnäu s ganze Schenge-Abkomme studiere
Dr Aedu und s Lisi Käser hei di Reis de aber doch no chönne wage
Und mir hei i üsere Nächi jetz zwöi Experte für Europafrage!

Am Flughafe Gänf isch ou dr Bossi Rico
wäg ere fählende ID chli is Schwitze cho
Am Zoll tüe si leider ke ec-Karte akzeptiere
Chönntsch’s  s nächschte Mou ja mit der Super-Card probiere

Dank

Liebi Fasnachtsfründe!
Härzliche Dank, dass dir üs jedes Jahr vo Nöiem ungerstützit, sig das mit Gschichte lifere oder em Bsuech a eim vo üsne Uftritte!
Nume dank öich aune dörfe mir jedes Jahr üsem Hobby fröhne und es nöis Programm zämesteue!
Merci viiu mau!

Und mir sie s ganze Jahr Abnähmer vo öine Gschichte:

tratschhenne@hotmail.com